Peire de Barjac, Tot francamen, domna, veing denan vos

Peire de Barjac.

7225.

Peire de Barjac si fo uns cavalliers compaignon d'en Guilhem de Balaun; e fo fort adreg e cortes, e tot aitals cavalliers com taingnia à Guilhem de Balaun. E si enamoret d'una domna del castel de Javiac, la moiller d'un vavassor, et ella de lui; et ac d'ellei tot so qe il plac. E Guilhem de Balaun sabia l'amor de lui e d'ella. E venc si c'una serra el venc à Javiac com Guilhem de Balaun, e fo sentatz à parlamen ab sa domna, et avenc si que P. de Barjac s'en parti malamen com gran desplazer, e com brau comiat qu'ella li det. E quant venc lendeman, Guilhem s'en parti e Peire com lui trist e dolenz. En G. demandet per que era tant tristz; et el li dis lo covinen. En Guilhem lo confortet, disen qu'el en faria patz. E no fon lonc temps que il foron tornat à Javiac, e fon faita la patz; e s'en parti d'ella con gran plazer que la domna li fetz. Et aqui son escrit lo comiat qu'el pres de lei.

7225.

Tot francamen, domna, veing denan vos

Penre comiat per tostemps à lezer;

E grans merces quar deingnastes voler

Qu'ieu mi tengues de vostr'amor plus gai

Tan quan vos plac. Mas aras, pos nous plai,

Es ben razos que si voletz aver

Drut d'autra part queus posca mais valer

Ieu' l vos autrei: ja pietz nous en volrai, (Ieu 'l) 

Ans aurem pois bon solatz entre nos,

Et estarem com si de re no fos.

Per so, domna, tostemps serai curos

De vostr' afar, qu' aisso 'n volh retener; 

Qu'ieu no lo posc gitar à non caler 

Aissi del tot, qu'enans vos servirai,

Fors que jamais vostre drutz no serai, 

Si be m deves encaras lo jazer 

Que m promezest quan n'aurias lezer. 

Non dic per so que negun soing non ai; 

Mas s'ieu en fos agutz ans poderos, 

Tal ora vi qu'ieu pogr' esser joios.

Mas vos cujas, quar ieu soi adiros,

Qu'aissi com soill non o diga de ver;

Mas d'er enan vos o farai parer:

Qu'ieu ai cauzit en lei cui amarai,

E vos avetz cauzit, si com ieu sai,

En un tal drut queus fara decazer;

Et eu en tal que vol pretz mantener,

En cui jovens s'apropch' e de vos vai:

Si tot non es de loc tan paratjos,

Il es assatz e plus bell' e plus pros.

E si'l jurars e'l plevirs de nos dos

Pot al partir de l'amor dan tener,

Anen nos en é las mas d'un prever,

Absolvetz mi et ieu vos solverai;

E pois poirem quascus d'aissi en lai

Plus lialmen bon'amor mantener.

E s'anc vos fis ren queus deja doler,

Perdonas me, qu'ieu vos perdonarai

Alegramen; qu'estiers non es ja bos,

Si de bon cor non es fatz lo perdos.

Mala domna trop mi fezes zelos

No fessi re mas al vostre plazer;

Quar hom zelos non a sen ni saber,

Ni res no sab lo mal que zelos trai,

Ni re zelos no sab que ditz ni fai

Ni nul zelos no pot en loc caber,

Ni patz non a zelos mati ni ser;

Per que vos deu plazer quan m'en partrai,

Qu'assatz val mais à celui qu'es lebros:

Qu'adoncs sivals no son tuit enoios.

Fe que m devetz, si tot soi adiros,

Prendatz comiat de mi, q'eu'l pren de vos.

Lo Coms de Peitieus. 7225. Farai un vers de dreit nien, (PO, Rochegude)

Lo Coms de Peitieus.

7225.

Lo Coms de Peitieus si fo uns dels majors cortes del mon, e dels majors trichadors de domnas; e bons cavalliers d'armas, e larcs de domnejar. 

E saup ben trobar et cantar: et anet lonc temps per lo mon per enganar las domnas. Et ac un fill que ac per moiller la duquessa de Normandia, don ac una filla que fo moiller del rei Enric d'Engleterra, maire del rei jove, e d'en Richart, e del comte Jaufre de Bretaingna.

7226, 7698.

Farai un vers de dreit nien,

Non er de mi ni d'autra gen,

Non er d'amor ni de joven,

Ni de ren au,

Qu'enans fui trobatz en dormen

Sobre chevau.

No sai en qual guiza m fui natz,

No sui alegres ni iratz,

No sui estranh ni sui privatz,

Ni non posc au,

Qu' enaissi fui de noitz fadatz

Sobr' un pueg au.

No sai quora m sui endormitz,

Ni quora m velh, s'om no m'o ditz.

Per pauc no m'es lo cor partitz

D'un dol corau;

E no m'o pretz una soritz,

Per sant Marsau.

Malautz sui e tremi morir;

E ren no sai mas quan n'aug dir.

Metge querrai al meu albir,

E no sai tau:

Bos metges es qui m pot guerir,

Mas non sia mau.

M'amiga ieu no sai qui s'es,

Qu'anc no la vi, si m'ajut fes,

Ni m fes que m plassa ni que m pes,

Ni no m'en cau,

Qu'anc non ac Norman ni Frances

Dins mon ostau.

Anc no la vi et am la fort;

Anc non aic dreit ni no m fes tort;

Quan no la vei be m'en deport,

No m pretz un iau,

Qu'ieu sai gensor e bellazor,

E que mais vau.

No sai lo luec ves on s'esta,

Ni si es en pueg o en pla.

Non aus dire lo tort que m'a.

Abans m'en cau;

E peza m be quar sai rema.

Ab aitan vau.

Fag ai lo vers no sai de cui,

E trametrai lo à celui

Que lo m trametra per autrui

Lai ves Anjau,

Que m tramezes del seu estui

La contra-clau.

// Guillermo IX de Poitiers fue padre de Inés o Agnès, esposa de Ramiro II de Aragón (en segundas nupcias), y madre de la reina Petronila de Aragón, luego fue su abuelo materno. No hace falta discutir sobre la lengua materna de la reina, la lengua occitana, el occitano, òc, oc, och, hoc. Fue bisabuelo de Alfonso II de Aragón. //

42. Lanfranco Cigala. Estiers mon grat mi fan dir villanatge

42. Lanfranco Cigala. *

Della prima si dà il testo edito dal Mahn (Werke d. Troub. III, 122); 

per la seconda si riproduce la lezione del canz. I.

Estiers mon grat mi fan dir villanatge

li faillimen vironat de follia

d' un croi marques, e sai qu' eu fas follatge

q' ab escien failh per autrui follia

mas una res m' escuza, s' o enten,

que si fossen cellat li faillimen,

ja del faillir non agr' hom espaven,

e qui mal fa, ben dei sofrir q' om dia.

Per qu' eu dirai d' un fol nega barnatge, 

sosterra pretz e destrui cortesia,

qu' om ditz qu' e natz de Monferrat linatge

mas non pareis a l' obra qu' aissi sia; 

ans crei que fo fils o fraire de ven,

tan cambia leu son cor e son talen: 

en Bonifaz es clamatz falsamen, 

car anc bon faig non sap far a sa via.

Son sagramen sai eu quel mis en gatge

als Milanes et a lur compagnia,

e 'n pres deniers per aunir son paratge, 

e vendet lur la fe qu' el non avia; 

pero de fe d' eretges nol repren, 

qu' el jura leu e fail son sagramen; 

e s' el annatz volgues rendre l' argen 

del sagramen crei q' om lo quitaria.

Tant es avols e de menut coratge 

qu' anc jorn nol plac pretz de cavalaria, 

per qu' a perdut pro de son heritatge, 

q' anc non regeis per ardiment un dia; 

mas qar a faz dos traimens tan gen 

a son seingnor, a Tan primieramen, 

pois a Milan a cui frais convinen, 

e cuja a obs cobrar sa manentia.

S' eu fos seigner ja nom feir' homenatge 

adrechamen, car sai qu' el nol tenria; 

nim baisera mais de boch' el visatge, 

car autra vez lam baiset a Pavia, 

pois en baiset lo papa eissamen; 

donc pois aissi tota sa fe demen, 

s' ab me jamais fezes paz ni coven, 

si nom..., ren nol creiria.

Ai! Monferrat plangues lo flac dolen, 

quar aunis vos e tota vostra gen, 

qu' aissi fenis l' onratz pretz veramen 

que Monferratz per tot lo mon avia. 

Aunit marques, al diabol vos ren 

qui tal vassal taing aital segnoria.

Seingner Thomas, tan mi platz

lo pretz c' om de vos retrai,

eil honrat fatz que vos faitz lai,

vos mi fan tan plazer de zai,

que tot zo qu' eu posc ni qu' eu sai

vos profer et ancora mai,

que pauc mi sembla zo qu' eu ai

ad honrar vos si com s' eschai;

per qu'eu d'aillors men propterai. 

E temeria faillir

s' ieu m' enardis de querir

quem voillatz per amic tenir. 

mas car de tot mon cor dezir 

vostres precs per comanz auzir

e vos honrar et hobezir, 

aisso m' en fai tot enardir, 

qu'om pot bon demandar e dir

lai on hom al cor de servir. 

E certanament voc dic (vos dic)

que ja nom trobarez tric

ni fals ni fellon ni enic,

auz mi trobarez de cor ric, 

qui que l'aia croi ni mendic,

et auriam per enemic

quius fezes enoi ni destric, 

nim creiria d'aisso chastic, 

qu' aissi deu hom amar amic. 

E pos sui asseguratz 

a demandar so quem platz, 

prec que coblejan respondatz 

ad aquestas coblas qu' eu fatz 

per fermar nostras amistatz. 

mas eu non quier ges quem digatz 

sius es gais ni enamoratz;

qu' aisso sai eu ben qu'es vertatz, 

qu' estiers non foratz tant prezats. 

Pero sius ven a plazer 

del vostre noble saber, 

voill per vos auzir e saber, 

quar molt en poirai mais valer, 

mas trop plus voluntiers vezer 

vos volgr' ieu, zo sapzats en ver; 

mas quecs deu laissar remaner 

zo que vol, cant nol pot aver, 

tro que n' ai' autra veg lezer.

En Romas, cel quis fai valer 

vos don complir vostre plazer, 

et a mi don sen e poder 

d'onrar vos quell ai lo voler.

* Biografia, secondo il testo edito dallo Chabaneau (op. cit. p. 105): 

En Lanfrancs Cigala si fo de la ciutat de Genoa. gentils homs e savis fo; e fo jutges cavalliers, mas vida de juge menava. et era grans amadors; & entendia se en trobar, e fo bos trobaire, e fetz mantas bonas cansos; e trobava voluntiers de Dieu.