15. Bertrando dal Bornio, Non puosc mudar, un chantar non esparga,

15. Bertrando dal Bornio. *

Secondo il testo ricostituito dallo Stimming (Bertran de Born, sein Leben und seine Werke, Halle, Niemeyer, 1879, p. 183).

Non puosc mudar, un chantar non esparga, 

pois n'Oc e Non a mes fuoc e traich sanc, 

car grans gerra fai d'escars senhor larc, 

per quem plai ben dels reis vezer la bomba,

que n'ajon ops paisson, cordas e pom, 

e 'n sion trap tendut per fors jazer, 

ens encontrem a milliers et a cens, 

si c'apres nos en chant hom de la gesta. 

Qu'ieu n'agra colps receubutz en ma targa 

e faich vermelh de mon gonfanon blanc, 

mas per aisso m'en soffrisc e men parc 

que n'Oc e Non conosc qu'un dat mi plomba, 

mas non ai ges Lizinhan ni Rancom, 

qu'ieu puosca lonh ostejar ses aver, 

mas ajudar puosc de mos conoissens, 

escut a col e capel en ma testa.

Sil reis Felips n'agues ars una barga

denan Giortz o crebat un estanc, 

si qu' a Roam, intres per forssa el parc, 

que l'asetges pel puoig e per la comba, 

c'om no 'n pogues traire breu ses colom:

adoncs sai eu qu'el volgra far parer 

Carle, que fon dels mielhs de sos parens, 

per cui fon Polha e Sansonha conquesta. 

Anta l'adutz e de pretz lo descarga

gerra cellui cui hom no 'n troba franc; 

per qu'eu non cuich, lais Caortz ni Caiarc 

mos Oc e Non, pois tant sap de trastomba; 

sil reis li da lo thesaur de Chinom,

de gerra a cor e aura 'n pois poder; 

tant l'es trebalhs e messios plazens 

que los amics els enemics tempesta.

Anc naus en mar, quand a perdut sa barga

et a mal temps e vai urtar al ranc 

e cor plus fort qu'una sajeta d'arc

e leva en aut e puois aval jos tomba, 

non trais anc pieitz, e dirai vos ben com; 

qu'ieu fatz per lieis que nom vol retener, 

que nom manten jorn, terme, ni covens, 

per que mos jois, qu'era floritz, bisesta. 

Vai, Papiols, ades tost e correns, 

a Trainac sias anz de la festa;

Dim a 'n Rotgier, et a totz sos parens 

qu'ieu non trob mais omba ni om ni esta.

* Biografia, secondo il testo edito dallo Chabaneau (op. cit. pp. 17 e 27): Bertrans de Born si fo de Lemozi, vescoms d'Autafort, quei avia prop de mil homes. et avia fraires e cujavals dezeretar, si no fos lo reis d'Englaterra. molt fo bons trobaire de sirventes, & anc no fes chansons fors doas. el reis d'Arago donet per molhers las chansons d'en Guirant de Bornelh (Guiraut de Borneill) a sos sirventes. et aquel que cantava per el, avia nom Papiols; et era azautz hom e cortes. e clamava Rassa lo comte de Bretanha, e lo rei d'Anclaterra (Anglaterra) Oc e No, el rei jove son filh, Marinier. et avia aital uzatge c'ades fazia mesclar lo paire el fill d'Englaterra, tant quel joves reis fo mortz d'un cairel, en un castel de Bertran de Born. e Bertrans de Born sis vanava qu'el cujava tan valer que ja no cujava que totz sos sens l'agues mestier. e pueis lo reis lo pres, e quant l'ac pres, el li dis: Bertrans, auraus encara mestier totz vostre sens! et el respos qu'el avia tot son sen perdut, quan lo reis joves morit. adonx si ploret lo reis de son filh, e perdonet li, el vestit, elh det terras & honors. e visquet longuamen el segle e pueis rendet se a l'orde de Sistel. (Císter, Cistell)

Anc mais per re qu'en Bertrans de Born disses en coblas ni en sirventes al rei Felip, ni per recordamen de tort ni d'aunimen quelh fos ditz ni faitz, no volc guerrejar lo rei Richart; mas en Richartz si salhi a la guerra, quant vic la frevoleza del rei Felip, e raubet e preset e ars castels e borcs e villas & aucis homes e pres; don tuich li baron a cui desplasia la patz, furon molt alegre, en Bertrans de Born plus que tuich, per so que plus volia guerra que autr'om, e car crezia que per lo seu dire lo reis Richartz agues comensada la guerra, ab lo qual el s'apellava Oc e Non, si com ausiretz el sirventes qu'el fetz si tost com el auzi qu'en Richartz era salhitz a la guerra, la qual comensa: Non puosc mudar...

col. 40, r. 12, corr. porta

41, 44 pois

43, 26 del mar

45, 23 car' a

47, 21 a nom

48, 32 Guiraut

37 mesclar] guerra entrels baros; e fetz mesclar

57 foron

(Versión de Raynouard : Non estarai mon chantar non esparja)

5. Girauz de Cabreira, Cabra juglar non puesc mudar

5. Girauz de Cabreira.

Secondo la lezione del ms. Estense 153, pubblicata dal Bartsch (Denkmäler der provenzalischen Literatur, Stuttgart, 1856).

Cabra juglar non puesc mudar,

qu'eu non chan, pos a mi sap bon;

E volrai dir senes mentir,

e comtarai de ta faison:

Mal saps viular e pietz chantar

del cap tro en la fenizon.

Non sabz finir al mieu albir

a tempradura de Breton.

Mal t'ensegnet cel quet mostret

los datz a menar ni l'arson.

Non saps balar ni trasgitar

a guisa de juglar Guascon.

Ni sirventesc ni balaresc

non t'auc dir ni nuilla fazon;

Bons estribotz non t'ieis pelz potz,

retroencha ni contenson.

Ja vers novel bon d'en Rudel

non cug quet pas sotz lo guingnon,

De Markabrun ni de negun

ni d'en Anfos ni d'en Eblon.

Jes gran saber non potz aver,

si fors non ieis de ta rejon.

Pauc as apres qe non sabs jes

de la gran jesta de Carlon:

Con eu trans portz per son esfortz

intret en Espaigna abandon.

De Ronsasvals los colps mortals

qe ferol dotze conpaignon,

Con foron mort e pres a tort,

trait pel trachor Goanelon

A l'amirat per gran pechat

et al bon rei Marselion.

Del Saine cuit c'ajas perdut

et oblidat los motz el son;

Ren non dizetz ni non sabetz:

pero noi ha meillor chanson.

E de Rotlan sabs altretan

coma d'aiso que anc non fon.

Conte d'Artus non sabes plus

ni del reprojer de Marcon.

Ni sabs d' Ajloz com anet solz

ni de Marchari lo felon.

Ni d' Aufelis ni d' Anseis

ni de Guillemes lo baron;

De Florisen non sabs nien

ni de las ganas de Milon.

Del Loerenc non sabs co venc

...

Ni sabs d'Erec con conquistec

l'esparvier for de sa rejon.

Ni sabs d'Amic con si guaric

Ameli lo sieu conpaignon.

Ni de Robert ni de Girbert B. Gribert

ni del bon Alvernatz Uguon.

De Vezia non sabs cos va

ni de Guondalbon lo Frizon;

Del duc Augier ni d'Olivier

ni d'Estout ni de Salomon;

Ni de Loer ni de Rainier

ni de Girart de Rossillon;

Ni de Davi ni de Rai corr. Kai?

ni de Berart ni de Bovon;

Ni de Costanti non sabs con di

de Roma ni de Prat Neiron;

De Gualopin ni de Guarin ni de Sanguin

ni d'Olitia ni de Dovon.

De Guajeta ni d'Aigleta

ni de Folqueis ni de Guion.

Ni de Aimar ni de Guasmar

ni de Faquele ni d'Orson... ms. ni ni d'O. 

Ja de Mauran om not deman

ni de Daurel ni de Beton.

Jes non saubes, si m'ajut fes,

del setge qe a Troia fon...

Ni del bon rei non sabs qes fei,

d'Alixandre fil Filipon.

D' Apoloine non sabes re

qu' estors de man de Perizon;

De Daire ros, qe tan fon pros,

qes defendet de traizon.

Ni d' Olivier non sabs chantier

ni de Verdun ni Vosprezon...

De Piramus qui for los murs ms. lo

sofri per Tibes passion;

Ni de Paris ni de Floris

ni de Bell'Aja d'Avignon...

Ni del vilan ni de Tristan

c'amava Yceut a lairon,

Ni de Gualvaing qui ses conpaing

fazia tanta venaizon...

De Lionas ja non sabras

ni de Tebas ni de Caton;

De Nersisec, d' Arumalec

ni de Calcan lo rei felon;

De Tideus ni de Formus

que sofri tanta passion;

Del cavalier ni del liurier

que sus en la garda mort fon;

Ni de Riqueut ni de Mareut

ni d'Arselot la contencon.

Non saps upar mot guariar

en glieiza ni dedinz maizon...   

col. 32, v. 57: Ajloz corr. Ajolz

XXI, Be volria de la mellor (Bernard d'Auriac)

XXI.

 

Be volria de la mellor

De totas far chanso plazen,

Quar d' autra chantar non enten

Mas de la verge de doussor;

Qu' estiers non puesc mielhs mos bons motz despendre

Qu' en la doussa dona de paradis,

On dieus pauset totz los bes e 'ls assis,

Per qu' ieu li prec que 'l plassa mon chant prendre.

 

Aitan ses plus viu ad honor

Totz hom, quant ama coralmen

Aquesta dona d' onramen,

E met son temps en sa lauzor;

Quar ela 'n pot mout bon guizardon rendre

Que non es joys, plazer, solatz ni ris

Que non agues totz hom que la servis

E qu' en s' amor totz temps volgues entendre.

 

S' om pogues partir de follor

E de malvais entendemen

Son cor, e servis leyalmen

La mayre de nostre senhor,

E no volgues dieus tan soven offendre

Ni ves lo mon tan fort estar aclis,

Ja fals' amor non l' agr' aissi conquis

Que 'l fezes tan sos avols dons atendre.

 

Nulhs hom no val ni a valor,

Si non lauza la plus valen,

La mayre de dieu doussamen,

Per cui si salvon peccador;

Quar en lieys son totz bos ayps ses contendre,

La mieller es que anc fos ni hom vis;

Tan fon lo pretz dels sieus bes ricx e fis,

Per que dieus volc en lieys per nos dessendre!

 

Mout hi fes gran a nos amor

Dieus, quan venc en lieys humilmen

Per delir nostre fallimen,

E per portar nostra dolor,

E s' en laysset als sieus trahir e vendre,

Et ab sa mort la nostra mort aucis:

Mortz eravam tug, si dieus no muris,

Per qu' a luy plac son cors en crotz estendre.

 

Bernard d' Auriac.