Descort anonyme.
Ab son gai plan e car,
Fas descort leu e bon,
Avinen per chantar
E de bella razon;
E s' eu pogues trobar
A leis, cui Deus bes don,
Chausimen, ges no m par
Agues ren si ben non.
Car cela m' a conqes
On son tuit faich prisan,
E anc tan bella res
No fo on vir e m' an;
Car son fin pres cortes
Puoia e creis e s' espan;
E s' eu ren far saubes
Qe il venghes en talan,
Ben fora rics e gais,
Ses pen' e ses dolor,
Si cela, cui bon prez nais,
Mi volgues dar s' amor,
Q' aisi 'l sui fis e verais
E ses cor trichador;
Et a cen tan e mais
Q' eu vos dic de valor,
Tan m' azenza
Sa parvenza
Que d' al no consire;
Penedenza
Et abstinenza
Ai c' altra non mire;
Mantenenza
Ab sovinenza
Ai gran del martire,
Car plivensa
Ses fallensa
Que ja no traire.
Farai sos manz a mon poder,
Car ren mai
Tan no m plai,
Sitot mi fai doler;
E s' eu n' ai
Un dolz bai,
Ren no m pot dan tener.
Bella donna, aiaz chausimen
De mi, q'eu non ai mais secors,
E ja per malvais parlamen
No us bais ni 'streing vostras lausors.
Descors, vai al conte valen
De Savoia, qar sa valor
Meillora tot jorn e no men,
Son ric prez val mais del meillor.
//
... (Pistoleta)
No vuelh en cort ses joi estar,
Ni ab baron desconoissen;
Ni no m' azaut de trop guabar,
Ni de companha d' avol gen;
Mas lo coms de Savoya m' a
Per amic, e tos temps m' aura,
Car el es pros e gent onratz,
Et mante proez' e solatz,
Et es de tos bos aips complitz:
Ben aya huey aital razitz.
...
