Elias Cairels. Pos cai la foilla del guarric

Elias Cairels.

7225.

Elias Cairels si fo de Sarlat, d'un borc de Peiregorc, et era laboraire d'or e d'argen, e deseingnaire d'armas: e fetz se joglar. Mal cantava e mal trobava, e mal violava e peich parlava; e ben escrivia motz e sons.

En Romania estet lonc temps; e quant el s'en parti si s'en tornet à Sarlat, e là el moric.

2701, 7225-6, 7698.

Pos cai la foilla del guarric

Farai un gai sonet novel,

Que trametrai part Mongibel

Al marques que'l sobrenom gic

De Monferrat e pren cel de sa maire;

Et a laissat so que conquis son paire.

Mal ressembla lo filh Robert Guiscart,

Qu'Antiocha conques e Mongiscart.

Marques, los monges de Clunhic

Volh que fasson de vos capdel,

O siatz abbas de Cistel;

Pos lo cor avetz tan mendic,

Que mais amatz dos buous et un araire

A Monferrat, qu'alhors estr' emperaire:

Ben pot hom dir qu'anc mais filh de lhaupart

No s mes en crotz à guiza de rainart.

Gran gaug agron tug vostr'amic

Quant agues laissada la pel

Don folres la cap' e'l mantel:

Quar totz cuideron estre ric

Cilh que per vos son liurat à maltraire,

Qui son tondut et an paor del raire.

Quascus aten socors de vostra part:

Si noi venetz, qui dol i a si'l gart.

Marques, li baron vair'e pic

An contra cel trait un cairel

Que lor tornara sul capel.

E de l'emperador Enric

Vos dic aitan que be sembl'al rei Daire,

Qui sos baros gitet de lor repaire,

Dont il ac pois de morir gran reguart:

Mas mantas vetz qui s cuida calfar s'art.

Lo regisme de Salonic,

Ses peireir'e ses manganel,

Pogratz aver; e mant castel

D'autres qu'ieu no mentau ni dic.

Per dieu, marques, Rotlan dis e sos fraire,

E Guis marques e'n Rainaut lor cofraire

Flamenc, Frances, Bergonhon e Lombart

Van tug dizen que vos semblatz bastart.

Vostr'ancessor, so au dir e retraire,

Foron tug pros; mas vos non soven gaire.

Si'l revenir no prendetz geinh et art,

Del vostr'onor perdetz lo terz e'l quart.e

29. Elia Cairel. Pos cai la foilla del guarric

29. Elia Cairel.

Secondo il testo costituito dal Rochegude (Parnasse Occitanien, p. 109) su 

C E I R.

Pos cai la foilla del guarric

farai un gai sonet novel,

que trametrai part Mongibel

al marques quel sobrenom gic

de Monferrat e pren cel de sa maire;

et a laissat so que conquis son paire.

mal ressembla lo filh Robert Guiscart, 

qu'Antiocha conques e Mongiscart.

Marques, los monges de Clunhic

volh que fasson de vos capdel,

o siatz abbas de Cistel; (Cluni; Císter, Cistell)

pos lo cor avetz tan mendic,

que mais amatz dos buous e un araire 

a Monferrat, qu'alhors estr' emperaire: 

ben pot hom dir qu'anc mais filh de lhaupart

nos mes en crotz a guiza de rainart.

Gran gaug agron tug vostr'amic, 

quant agues laissada la pel

don folres la cap' el mantel: 

quar totz cuideron estre ric

cilh que per vos son liurat a maltraire, 

qui son tondut et an paor del raire. 

quascus aten socors de vostra part: 

si noi venetz, qui dol i a sil gart. 

Marques, li baron vair' e pic

an contra cel trait un cairel 

que lor tornara sul capel.

e de l'emperador Enric

vos dic aitan que be semblal rei Daire, 

qui sos baros gitet de lor repaire, 

dont il ac pois de morir gran reguart; 

mas mantas vetz quis cuida calfar s'art. 

Lo regisme de Salonic,

ses pereir' e ses manganel, 

pogratz aver, e mant castel

d'autres qu'ieu no mentau ni dic. 

per dieu, marques, Rotlan dis e sos fraire, 

e Guis marques e 'n Rainaut lor cofraire, 

Flamenc, Frances, Borgonhon e Lombart

van tug dizen que vos semblatz bastart. 

Vostr' ancessor, so au dir e retraire, 

foron tug pros; mas vos non soven gaire. 

sil revenir no prendetz geinh et art, 

del vostr' onor perdetz lo terz el quart.